မြန်မာနိုင်ငံမှာ အာမခံလုပ်ငန်းက မဖွံ့ဖြိုးတာဟာ ပြည်သူတွေရဲ့ ရှေးရိုးစွဲအမြင်တွေကြောင့်က အဓိကဖြစ်နေပြီး နိုင်ငံခြားအာမခံလုပ်ငန်းတွေ ဝင်လာဖို့ စိတ်အားထက်သန်နေကြပါပြီ။ အာမခံလုပ်ငန်းလုပ်လိုတဲ့ နိုင်ငံခြားကုမ္ပဏီတွေ ကိုယ်စားလှယ်ရုံးခွဲ ၁၄ခုနီးပါးလောက် ဖွင့်လှစ်နေပါတယ်။ မြန်မာတွေ တကယ်ပဲ အာမခံအကြောင်း နားမလည်ကြဘူးလား။

အသက်အာမခံနဲ့ပတ်သက်ပြီး ပြည်သူတွေ အစွဲချွတ်ကြပါ၊ တရားသဘောနဲ့ပြောရင် ဖြစ်လာမယ့်ကိစ္စက ဖြစ်မှာမို့ အသက်အာမခံထားတာဟာ ငွေအသင့်အတင့်ရှိသူနဲ့ ဆင်းရဲတဲ့သူတွေအတွက် အကျိုးအမြတ်ရှိမှာကြောင့် ခေတ်နဲ့အညီ အတွေးအခေါ်တွေ ပြင်ဆင်စေချင်တယ်လို့ CB Insurance ရဲ့ မန်နေဂျင်းဒါရိုက်တာ ဦးသောင်းဟန်က ကမာရွတ်မီဒီယာကို သီးသန့်တွေ့ဆုံပြီး ပြောပြပါတယ်။

မြန်မာ့အာမခံလုပ်ငန်းတစ်ခုတည်းပဲ ရှိခဲ့တုန်းက ပညာရှင်တွေ မရှိခဲ့သလို ပြည်သူတွေလည်း ဗဟုသုတ မကျယ်ခဲ့တာကြောင့် အာမခံလုပ်ငန်းဖွံ့ဖြိုးရေး အတားအဆီးတွေဖြစ်ခဲ့ရတယ်လို့ ပြောပါတယ်။ ဒါပေမယ့် နည်းနည်းလေး ပြုပြင်ပြောင်းလဲလိုက်ရင် ကမ္ဘာ့အဆင့်မီဖို့ အချိန်သိပ်မကြာပါဘူးလို့လည်း ဆိုပါတယ်။

အထွေထွေအာမခံဆိုတဲ့ General Insurance နဲ့ အသက်အာမခံ Life Insuranceနှစ်မျိုးကို ပေါင်းထားတဲ့ ဟိုက်ဘရစ်စနစ်ကို မြန်မာပြည်မှာ ပုဂ္ဂလိကကုမ္ပဏီ ၉ခုက လုပ်ကိုင်နေပြီး အသက်အာမခံကို သီးသန့်လုပ်တဲ့ ကုမ္ပဏီက ၃ရှိပြီး အစိုးရပိုင် မြန်မာ့အာမခံလုပ်ငန်းနဲ့ဆိုရင် ကုမ္ပဏီပေါင်း ၁၃ခုရှိနေပါတယ်။ အထွေထွေအာမခံကတော့ ပိုင်ဆိုင်မှုပစ္စည်းတွေ သဘာဝဘေးကြောင့်ဖြစ်စေ၊ ရန်သူမျိုးငါးပါးကြောင့်ဖြစ်စေ ပျက်စီးဆုံးရှုံးသွားတာကို ငွေကြေးနဲ့ပြန်လျော်ပေးတာဖြစ်ပြီး အသက်အာမခံကတော့ ပေါ်လစီရှိသူရဲ့ ဝင်ငွေပေါ်မူတည်ပြီး တန်ဖိုးဖြတ် တွက်ချက်ထားတဲ့ ပမာဏအတိုင်း ပြန်လည်ပေးလျော်တာဖြစ်ပါတယ်။

ဦးသောင်းဟန်က မြန်မာပြည်မှာ လက်ရှိကျင့်သုံးနေရတဲ့ ဝိုင်းကြီးပတ်အာမခံစနစ်ဖြစ်တဲ့Coinsurance အကြောင်း ကမာရွတ်ကို ရှင်းပြပါတယ်။

အာမခံထားတဲ့ပစ္စည်းရဲ့တန်ဖိုးကြီးလို့ ပေါ်လစီလက်ခံလိုက်တဲ့ ကုမ္ပဏီတစ်ခုတည်းအပေါ် ရောက်လာမယ့် အန္တရာယ်ကိုကာကွယ်ဖို့ ကျန်တဲ့ ပြည်တွင်းအာမခံကုမ္ပဏီတွေ မျှဝေခံရတဲ့စနစ်ဖြစ်ပြီး Reinsurance ဆိုတာကတော့ ပေါ်လစီလက်ခံတဲ့ ပြည်တွင်းကုမ္ပဏီတစ်ခုကို အခြားတစ်ဆင့်မြင့်တဲ့ ဒေသဆိုင်ရာနဲ့ ကမ္ဘာ့ အာမခံကုမ္ပဏီက တစ်ဆင့်အာမခံတဲ့စနစ်ဖြစ်ပြီး စနစ်နှစ်မျိုးမှာ Coinsurance က ရွေးချယ်ခွင့်မရှိဘဲ Reinsurance က ရွေးချယ်ခွင့်ရှိတယ်လို့ ဆိုပါတယ်။

အာမခံလုပ်ငန်းတစ်ခုလုံး ဖွံ့ဖြိုးဖို့ စီးပွားရေးတိုးတက်မှုနဲ့အတူ ခွင့်ပြုသင့်တာကို မြန်မြန်ခွင့်ပြုပေးဖို့ဖြစ်ပြီး ကောလိပ်၊ တက္ကသိုလ်တွေ ဖွင့်ပေးပြီး ကျွမ်းကျင်တဲ့အဆင့်ရောက်ဖို့က ၁ဝနှစ်လောက် အချိန်ယူရမယ်လို့ ပြောပါတယ်။ ဒီထက်မြန်ချင်ရင်တော့ နိုင်ငံခြားကုမ္ပဏီတွေနဲ့ ပူးပေါင်းခွင့်ပေးဖို့ ဖြစ်တယ်လို့ ဦးသောင်းဟန်က ဆိုပါတယ်။

အာမခံပေါ်လစီဝယ်မယ့် မြန်မာပြည်သူတွေ ဗဟုသုတရှိဖို့၊ အာမခံဝယ်နိုင်တဲ့ ဝင်ငွေရှိဖို့လိုပြီး နိုင်ငံခြားကုမ္ပဏီတွေနဲ့ ဖက်စပ်လုပ်ကိုင်ခွင့်ပေးဖို့လိုတယ်လို့ ပြောပါတယ်။ အာမခံဟာ ဘဏ်နဲ့မတူတာကြောင့် မြန်မာအစိုးရက ခွင့်ပြုထားတဲ့အချက်တွေ ခေတ်နဲ့မလျော်ညီတော့တာမို့ ခေတ်နဲ့ညီနဲ့ ပေါ်လစီတွေကို လုပ်ခွင့်ပေးရင် နေ့ချင်းညချင်း ပြောင်းလဲသွားမယ်လို့ ရှင်းပြခဲ့ပါတယ်။